Song 4 | KYG | STEP | Nahau nayamopafi'mo ne'nahaiya a'nimogae, huno, vae, alagepa kanale a kanomo mai'nane. He, alagepa kanale a kanomo mai'nane. Kaulagamo'a kaugo'yavemo aulagagana huno hane'nigeno kanale kayoka'mo'a aino ati kae'niye. Kayoka'mo'a meme anaga'mogi Gileyati avelegati'mo magokepi lokaeli'a nelamiya meme anaga'ai apayokakana huno hane'niye.

Song of Solomon 4

1 Nahau nayamopafi'mo ne'nahaiya a'nimogae, huno, vae, alagepa kanale a kanomo mai'nane. He, alagepa kanale a kanomo mai'nane. Kaulagamo'a kaugo'yavemo aulagagana huno hane'nigeno kanale kayoka'mo'a aino ati kae'niye. Kayoka'mo'a meme anaga'mogi Gileyati avelegati'mo magokepi lokaeli'a nelamiya meme anaga'ai apayokakana huno hane'niye. 2 Muki kave'amo'mo yaveyave sipisipi anaga'mogi apayoka'mo magoke aiyaya hu'a lagau'a apatete'a hemenimo ani'mo fale'a apate'nageno'ae'mo apayoka'mo'a yaveyave'age nehiya kava huno kave'mo'a yaveyave'age'mo nehiye. Mani muki sipisipi anaga'mogimo lago'ya apana'aumo male'nae. Mago anamo sipisipimo o'mai'nae. 3 Kavayamo kanale haesa nofikana huno hane'nigeka alagepa kagemo ne'aine. Kayoka'mo'a aino ati kae'niya kagesa aepale'mo mago yosamo agi'amo pamagalanati alagamo aino apalo ati'niya yosa alagagana huno hane'niye. 4 Lugokamo'a kini vekamo Nevini'a kame nehiya ya'amo male'niya no'mo yatala vegovego nokana huno hane'niye. Ani nopi'mo lokiya kame nehaya vaya'ai halegu'apimo tauseni'a halegu'mo asai male'nae. 5 Lole nukala'mo'a kanale lago'ya afela afula'moganimo yaveyave kahaumo ausemo hane'niya folagapati'mo kahaumo ne'na'a afulakana huno hane'niye.

6 Nagaemo alagepa atu ne'aiya yosamo hane'niya avefi'mo hai'na maime maime ne'visugeno'ae'mo kotisigeno'ae'mo hani hu'niya kava'mo hano hugiye. 7 Nahau nayamopafi'mo ne'nahaiya a'nimogae, huno, alagepa kanale a kanomo mai'nane. O'ani'ya faifa ya'mo kagaete'mo ohane'niye. 8 A'nimogae, huno, kagaemo nagae'e'mo Lemanoni aveleti'mo ataleka ugeta'ao. Amana avelegati'mo agege Sena avelegati'mo agege Hemoni avelegati'mo agege huka ago. Ani lole'e mago'e avefi'mo Laiyoni anaga'e Laiyonigana hu'a mai'naya afela pusi anaga'e'mo mai'nae. 9 Nasa'nimogamo a'nimae, huno, kagaemo aise'ato'amo nagaemo aulu nahaeka ne'naganageno'ae'mo naipafi'mo lusi kava huno naha'ye hu'niye. Nagaemo lugokamo agete'nae'mo kagaete'mo asagau'na ne'auve. 10 Nasa'nimogamo a'nimae, huno, Nagaefe'mo kahau kayamopafi'mo kahau'niya kava'mo'a alagepa kanale kava'mo hane'niye. Ani kahau'niya kavakamo haga'amo'mo nofi alagafati ani'mo nehiya haga'amo alagi ago aeno agase'niye. Ani nefalana ani'mo'a alagepa atu'amo'mo muki alagepa atumo ne'aiya ya'mo atu'amo ago aeno agase'niye. 11 O a'nimogae, huno, Kavayafati'mo kevegeve anumo asagauno ne'aiye. Kavenafu'namo afe'alumelaga kevegevemo anu'e nu'anu'e'mo hane'niye. Kukenakalegati'mo alagepa atumo Lemanoni avefati'mo ne'aiya agufa alagepa atumo ne'aiye.

12 Nasa'nimo'mo maige a'nimo maige huno mai'niya a'nimo'a hoyale'mo kegi'yamo'a faino ku ai'niya hoyagana huno maige keli kotupi ani'mo muki vaya'mogimo o'nesayafe'mo ka akani male'niya keli kotupi anikana huno maige ani'mo kanage kanage huno haine ne'eya anite'mo loki ae male'niya anikana huno maige huno mai'niye. 13 Kagae hoyafati yosamo'mo alagepa alagamo ne'ae. Haga atumo ne'aiya ya'mo nehage. Mago'aleti'mo alagepa atumo ne'aiya ya'mo alo huge haga ne'ya'mo alo huge la'nefamo atafi kageno halinamo ne'aigeno'ae'mo alagepa atumo ne'aiya la'nefamo alo huge hu'a alo nehae.

15 Kagaemo kanage kanage huno haine ne'eya ani'mo'a muki hoyafilagamo nelamiya anikana huka maige Lemanoni avefati'mo emine ne'eya anikana huka maige huka mai'nane. 16 Hoga haopalegati'mo yasimo alinika eno. Lamaga haopalegati'mo yasimo alinikeka hoya'nifi'mo aligeno'ao alagepa atumo ne'aiya ya'mo'a muki haopalegamo ailino uneno hino. Nahau nayamopafi'mo ne'nahaiya veka'nimo'a hoya'afati'mo eno alagepa yosa alagamo lagino neno.